الكريمة المخفوقة

‫الكريمة المخفوقه
Whipped cream

لكريمة المخفوقه عبارة عن رغوه بكل بساطه هي رغوه
الرغوه عباره عن فقاعات هواء محاطه بجدران نحيفه كل ماكانت الجدران هذي متينه وقويه أكثر كل ماكانت الرغوه هذي ثابته أكثر يعني الهواء اللي في الفقاعات ما يطير في الجو بسرعه كونه ممسوك بجدران قويه
الرغوه هنا في حالتنا جدرانها ميه بس الميه لحالها ما تكون رغوه صح ؟
قد حاولتوا تخفقون ميه ولقيتوا رغوه ؟ مستحيل ؟
عشان كذا نحتاج شي يمسك أو يثبت الميه اللي هي جدران الفقاعات حقت الهواء - السكر - البروتين حق الحليب - و الدهن
هم اللي بيثبتون الميه في مكانها وخصوصا الدهن كونه أهم شي في حالتنا
الدهن في الكريمه يكون على شكل نقط صغيييييره موزعه في الكريمه
مع الخفق تتكون الفقاعات ويكون الدهن موزع حولين هذي الفقاعات صح
الدهن مع الخفق يبدأ يلصق في بعض وبكذا يثبت هذي الفقاعات في مكانها
نوعية القشطة المستخدمه هنا جدا مهمه - قشطة الخفق العاديه هي أفضل شي لعمل الكريمة المخفوقة
ومن هنا أصلا جت التسميه - قشطة خفق
نسبة الدسم هي المحدد الأساسي هنا قشطة الخفق العاديه فيها من ٣٥-٣٨ % نسبة دهن وهي النسبه المناسبه لهذي الحالة . الحليب كامل الدسم فيه ٣٪ دسم بس ! ، الحليب قليل الدسم فيه ٢٪ وعشان كذا مستحيل يعطونك كريمة خفق
كريمة الخفق قليلة الدسم يكون فيها في الغالب ١٥٪ دسم وراح تعطي كريمة مخفوقه بس كون الدسم جدا قليل فيها ماراح تعطي كميه هواء كثير يعني ماراح تنفش زي العاديه
ولا راح تثبت بعد زي العاديه عشان كذا تحتاج مثبتات من برا غير الدهن الموجود فيها
لو الدسم كان أعلى من ٣٨٪ موب شرط أحسن ! كون الدهن أكثر معناه إنه راح يتجمع مع بعض أسرع ويعطيك زبده قبل حتى لا يوصل لمرحلة الكريمه المخفوقة
كريمة الخفق النباتيه بعدوا عنها هنا قدر الإمكان ، هذي كريمة صناعيه ! مصنوعه من زيوت مهدرجة مالها أي أي ميزه على الكريمه الأصليه غير إن طعمها أستغفر الله . شي ثاني ، الكريمة اللي تجيك طويلة الأجل ولو إنكتب عليها كريمة خفق أو قشطة خفق راح تعطي نتائج جدا سيئة مقارنة مع الكريمه قصيرة الأجل لا من ناحية ثبات الكريمة أو حتى نفشتها أو حتى الطعم. فيه أنواع تنباع في السوق تلاقين عليها علم فرنسا وغيره وعليها صوره كريمة مخفوقه وكل هذا الكلام .. كونها من فرنسا موب شرط إنها أحسن هذي كريمة خفق طويلة الأجل بس مستورده وسعرها أغلى من المحلية . خلاصة الكلام .. أستخدموا كريمة خفق غير نباتية ، كاملة الدسم يعني نسبة دسم (٣٥-٣٨٪) ، قصيرة الأجل .. هذي راح تعطي أفضل نتيجة بالنسبه للماركات ما أعتقد يفرق كثير بس جربوا وشوفي وش اللي يعجبكم .

♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥

المكون الثاني هنا هو السكر
السكر مكون إختياري بس هو يساعد على تثبيت الكريمة فترة أطول
أي نوع سكر ممكن يستخدم السكر الأبيض العادي ينفع بس السكر المطحون يفضل كونه أسهل يذوب . السكر البني ، العسل
أو حتى شراب الذرة أو أي نوع سكر ممكن يستخدم هنا عشان يعطي نكهة ثانية للكريمه لو نبي
كمية السكر المستخدمه تقريبا من ملعقتين كبار إلى ٦ ملاعق كبيره لكل كوب قشطة خفق

♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥

الطريقة الأولى - الغير مثبتة

كوب قشطة باااااااااااااااااااااارد .. لا تتهاونون أبدا بهذي النقطة
رشة ملح
أي سكر أو نكهة لو تبون طبعا زي ما شرحت فوق
نبدأ أول شي بإننا نحط الصحن حق الخلط و المضرب حق الخلط بعد في الفريزر حوالي نص ساعة
الصحن يفضل يكون معدن بس القزاز بعد بينفع
البلاستك خيار جدا سيء هنا
بعدين نحط الكريمه و رشة الملح و نبدأ نخلط على سرعه هاديه في البدايه إلين ما يبدأ الخليط يصير شوي رغوه بعدين نزيد السرعه على أعلى شي نسوي كذا عشان ماتنرش كل الكريمة في وجهنا
نبدأ الحين نخلط معه السكر - لو كنت بحط معه سكر
النكهات بأنواعها إلا الأنواع اللي تنحط آخر شي مثل الساور كريم مثلا .بعدين نخليه ينخلط إلين الدرجة المطلوبه
نوقف خلط كل شوي ونرفع الخلاط ونشوف كيف شكل الخليط
إذا نبي كريمة مخفوقة نرفع الخلاط و المفروض يكون ماسك
احظوا إنه محافظ على شكله أبيض ناصع وإذا رفعنا المضرب حق الخلاط كيف الرؤوس حقته واقفه ما تستسلم للجاذبيه هذي اللي يسمونها مرحله الرؤوس الصلبة أو ال
stiff peaks
أو منقار الطير أول ما نوصل هذي المرحله نوقف علطول ! أكثر من كذا وبيبدأ شوي شوي يقلب الخليط أصفر بعدين بتلاقون زبده ومويه زبده تحت
أما إذا نبي كريم شانتيه نحلي الكريمه حقتنا و نسويها بفانيلا و نخفقها لدرجة أقل من منقار الطير يعني مفروض تصير إذا رفعتي الخلاط فيه رؤوس واضحه بس تستسلم للجاذبيه عكس هنا
بس هذا الفرق الوحيد بينهم
لاحظتوا كيف المسألة مافيها أي شي يخوف أبدا
أنا أستخدمت هنا خلاط كبير أو عجانه
بس اللي ما عنده أبدا موب ضروري يمديكم توصلون نفس النتيجة بالضبط بخلاط كهربائي يدوي أو حتى بخفاقة بيض عاديه
هذا الخليط كونه مش مثبت يفضل يتقدم بسرعه كونه ينهد بسرعة


♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥

الطريقة الثانية - مثبتة

هنا راح نثبت الخليط بشوي جيلاتين الجيلاتين يعطي قوة للكريمة ويعطينا قدرة نحفظها وقت أطول غير إنها كذا راح تصير ثقيلة أكثر في حال حبينا نزين كيكه مثلا فيها
لكل كوب قشطة خفق نحتاج نص ملعقة صغيره جيلاتين + ملعقة كبيره مويه دافيه
نذوب الجيلاتين في المويه يمكن 5 دقايق
بعدين نحط المويه على حراره إلين يذوب الجيلاتين تماما
الحين نخلي خليط الجيلاتين إلين يبرد على حرارة الغرفة
لا تحطون هذا الخليط في الثلاجه كونه بيكون جيلي صعب ينخلط بعدين مع الكريمة عشان كذا أسهل شي هو إنكم تخلونه على حرارة الغرفة كم دقيقه إلين يبرد شوي
الباقي زي الوصفه الأولى
إذا وصلتوا المرحلة اللي تحطون السكر وغيره حطوا الجيلاتين معه وكملوا عاااادي


♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥

إنقاذ كريمة خربانة

طيب خل نقول إن الكريمة حقتك بدت تطيح بعد كم ساعة أو كم يوم وش نسوي ؟

ندخلها الثلاجه حوالي ساعة إلى ساعة ونص - بإفتراض إنها كانت شوي دافيه
ونرجع نخفقها شوي إلين ترجع زي ما كانت
بس أنتبهوا هنا كونها بترجع بسرعة دايما أستخدموا خفاقة يدويه لا تستخدمون خلاط أو عجانة أبدا

طيب خل نقول إننا غلطنا وزودنا خلط وبدأ الخليط يقلب أصفر وش نسوي ؟
الحل هنا هو إننا نزيد شوي قشطة خفق ونخفق بعد بخفاقة يدويه إلين يرجع زي ماكان . هذا الحل ممكن ينفع وممكن لأ
حسب المرحلة اللي وصلنا لها في الخفق يمكن يكون فات الأوان خلاص وما ترجع زي ما كانت
وفي هذي الحاله كملي خفق مرة ثانيه إلين تحولين الكريمة زبده و أستخدميها الجزأ الجامد من الخليط كزبده عادية و أرمي السايل

♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥ ♥

الحفظ و الإستخدام

الكريمة المخفوقة تكون في أفضل حالاتها أول ما تنخفق بعدين تبدأ تطيح شوي شوي. بعد الخفق إما إنها تستخدم في وقتها
أو ممكن تنحفظ حوالي يوم في الثلاجه بعد ما تغطون الصحن اللي خفقتوها فيه بنايلون
إذا جيتوا تستخدمونها أخفقوها شوي زياده بخفاقه يدويه ثواني بس عشان ترجع زي ماكانت قبل التبريد
لو كنتوا تستخدمون كريمة مثبته ممكن تنحفظ إلى ٣ أيام بشكل جيد في الثلاجه بعد ما تتغطى بنايلون
في حالة كانت راح تستخدم لتزيين كيكة مثلا أو حشوه لشي لازم الشي هذا يتبرد بعد كون الكريمه في الأساس حليب و الحليب يخرب ويحمض على حرارة الغرفه
الكريمة المثبته هي اللي في الغالب تستخدم لتزيين الكيكات و الحشو


الكريمة هذي إستخداماتها كثير غير إنها تكون عنصر لحالها في حلى هي بعد بتكون واحد من المكونات في أشياء كثير مثل الموس مثلا
بس بعطيكم أفكار بسيطة لها مع أشياء ممكن تتقدم معها

قرفة مع سكر بني … وقدميها مع باي مثلا تفاح أو غيره
عسل مع زنجبيل . بعد ممكن مع التارتات الحاره أو الباي
شيرة بانكيك ( أصليه ) مع قرفه أو جوزة طيب وقدميها مع البانكيك - سكر بني ، ملح ، وتتقدم مع الإسكريم أو تشيز كيك قرع مثلا
فانيلا مع كيكة برتقال مثلا
شكولاته بيضاء مع تشيز كيك شاهي أخضر مثلا .. أو مع كيكة شكولاته مثلا
ملح وفلفل أبيض وشوي ساور كريم آخر شي وتتقدم مع خبز توه طالع من الفرن